Volkert Ipsen

Zentrum für Niederdeutsch in Holstein - Autorenseite

Volkert Ipsen

"Volkert Ipsen, Johrgang 1954, opwussen op Nordstrand, leevt nu siet dörtig Johren in Lübeck, is dor Schoolmeister un hett twee Kinner. He snackt un singt dat Platt vun Nordstrand un hett in de 70er Johren as "Rocking Dr. Schwipsen" Platt un Pop-Musik op de Bühn bröcht un sien LP "Leeder de ik spääl" opnahmen. Later hett he sien Leeders uk bi "Talk op Platt" ümmer mol we'r vörstellt. Nich blots as Leedermaker hett Volkert Ipsen sik för Platt insett, he hett Platt-Stünnen an de Uni Kiel geven un in't ,Zentrum für Niederdeutsch' in Ratzborg. Midlerwiel helpt he junge Schoolmeisters, de sik uk an't Gymnasium för Plattdüütsch insetten schöllt." (2011)

De Blog vun Volkert Ipsen:
http://mienleeder.blogspot.com

Biografische Notizen: (ab 2001)

2001:

Volkert Ipsen is een vun de dree Lüüd bi't Plattdüütschzentrum in Ratzeborg. He kümmert sik üm Themen, de Volkshochschoolkursen un plattdüütsche Krinks angaht. Sünnerlich de plattdüütsch Literatur is sien Rebeet. He is 47 Johr olt, verheiraad't un hett twee Kinner.
De Leedermaker un Inselpoet läävt nu al vele Johren in Lübeck, aver in sien Songs un in sien Gedichten geiht dat meesdeels um Nordstrand, wo he opwussen is un sik vullsaben hett mit Biller un Geschichten vun´t Leven op´t Land in de sösstiger un söventiger Johren. Sien Songs maakt he mit Melodien ut de grote wiete Welt in´t Ohr un de Lüüd vör Oogen, as he se kennt hett: de Inselcoiffeur ("August-Moritz sien Salon"); de Bürgermeister ("jeder, de mi lieden mag, kummt uk langs mit mi"); de Ringriederkameraden ("man süht se al vun wieden, nu heet dat baben blieven"); de Blauen Jungs ("för de Kapelle Kümmerling"); de Footballers ("ik bün ümmer dor, wo de Ball jüst weer"); de Seglers ("op een Törn bit na Strucklahnungshörn").
As Schooljung hett he sien eerste Kapell hatt: "De Nordstrander Landgewinnungsmaschien". Mit Trummel, Gitarr un Orgel wurr achter de Dieken een gewaltigen Laarm maakt. As se sik utfidelt harrn, keem de Tiet för "Rocking Dr. Schwipsen". De seet op dat Bild vun sien eerste (un eenzige) Platte an een Klaveer in´t Water un is denn uk bald ünnergahn. Plattdütsche Musik mit Trummel, Vigelienen un Synkopen weer to de Tiet noch nich anseggt. Liekers hett em dat Leed vun de "Disco Dunnersdagavend" bit na´t Radio un na´t Fernsehen bröcht.
Tein Johr weer dat still, denn keem Volkert Ipsen torüch, anschaben vun plattdütsche Schrieverslüüd un Frünnen. Vun Glind bit Westerland hett he sien Leeder dörspäält vun de Quotenball in Haale, vun´t Gigi in Husum, vun de schöne Nahwersfru in Lübeck, vun Amanda bi Salamander un vun Susi, de fohrt de Bus in Kiel.

1999 is een CD mit 10 Leeders ruutbröcht worrn: "Wenn de Blauen Jungs we´r spälen". De "Quotensong", "Gigi" un dat Bürgermeisterleed sünd dor mit bi.
Een CD mit Leeders vun Klaus Groth warrt jüst inspäält, un in de "Stille Tiet" 2000 is een CD ruutkamen, de heet: "Düster överall".

In twee smalle Böker, "Nordstrand fangt an bi de Damm" un "Na Odenbüll, Krüüzweg un Noorden", hett Volkert Ipsen sien Erinnern an een Inselleven noteert as Gedichten.

CDs un Böker sünd in´n Egenverlag ruutkamen.

(nach: "Wat gifft't Nieges?" Narichtenblatt vun't Plattdüütschzentrum Ratzeborg, Fröhjohr 2001)

2004:

5. Januar 2004: Volkert Ipsen ward "50"

Rechttiedig för Wiehnachten 2003 is sien niege CD ruutkamen: "Kiek doch eenmol na mi hen"

"Na, dat hett sik ool Tizian sach uk nich vörstellen kunnt, wat he mol een plattdüütsche CD opschicken dörvt; in een anner Leven warr ik em dor noch een för utgeven. Aver wo kunn he weten, dat mien Schoolkamrad Jörg Langowski een Bild vun mi maakt hett, wo ik för luter Fruunslüüd nich weet, wo ik henkieken schall. Dat weer uns sülvern-Abi-Fier mit de Deerns vun de TSS.
Dat sünd ja uk wekeenen vun all de doren "Northern Girls", de ik as Jung direktemang in't Hart kieken kunn. Denn wat sä Marleen noch bi de Sülvern Kunfermatschoon: "Ipe, du weerst aver uk lütt." Dorüm bün ik uk bi jede Damenwahl sitten bleven. Dat piert noch ümmer. Man wat schallst maken - ik heff mi de Gitarr grepen un düchtig vun "Susan" sungen, dat wengst de Kumpels gau mol dal na den River durvsten un de Deerns villicht doch mal 'n Ogenblick lang na mi henkeeken. Un vun "Susan" weer dat nich wiet bit hen na Rosi, Susi un Amanda un Gisela, Frieda, Erika un Monika. Binah mien halve Programm is weiblich.
Man mien rode CD, de much ik uk noch een ganz annern todenken. Dat is Mobby. He is dor ja nu al mit langs. Aver ik seh em noch ümmer mit Unkel an de Straat stahn un gröten: Finger hoch un "Moin". Un denn seh ik em in Naemi ehr Danzlokal, wo de Blauen Jungs spälen un de Fruuns sik bi den Marschwalzer 'n Keerl för't Leven griepen. Die Hoffnung stirbt zuletzt, so sünd Mobby un wi anner Bagaluten denn ümmer we'r to Ball gahn, denn doch bi'n poor Kümmerling hangen bleven un toletz schumpeln wi mit'n Hoorbüdel we'r na Mutti na Huus.

Wat mien nächste CD gröön, gääl, oder vigelett warrt, wat dat överhaupt noch een anner Ipe-CD geven warrt, weet ik nich. Geneet disse man. Wi hebben dat in Stefan Buth (Produktion) sien Lokal (Musikhuus Andresen) mit de Blaue Jungs Olaf Erdmann (Slagtüüch) un Rüdiger Isler (Bass), de Rosi-Singers Marlis Buth, Ingrid und Jürgen Backhaus un Ulrike Calm (mien ganz grote Dankeschöön dorför!) un Ipe Aktaion an de Hammond opnahmen.

Veel Vergnögen wünscht Jem
Rocking Dr. a.D. Schwipsen

Lübeck 2003" (CD-Inlet)

2009:

5. Januar 2009: Volkert Ipsen is nu "55"

As Schoolmester is he bannig inspannt. Wat gifft dat dor allens to doon! Junge Schoolmesters wiest he, woans een Plattdüütsch in de School inbringen kann. För niege Leder blifft nich veel Tiet, un so gifft dat ok keen niege CD.
Man he findt jümmers noch Gelegenheit, in't ganze Land sien Leder to präsenteern: En Optritt op Nordstrand, in Mölln, in Ratzborg, in Bad Olsloe un jichens wo.
Un he is ünnerwegens mit sien Vördrag: "Snackt Platt mit Thomas Mann" - wat Volkert Ipsen to den Roman "Buddenbrooks" to seggen hett.

2010:

24. Oktober 2010: Volkert Ipsen ward Blogger

He kraamt in sien Archiv "Dusend Leeder un een" un schickt sik an, Texten un Leeder för uns all trech to maken.
"Nix geiht verloorn in't World-Wide-Web!"
http://mienleeder.blogspot.com

2011:

1. Dezember 2011: Volkert Ipsen stellt sien Book vör: "Tüüssadüüss"

Sien eerst Book, dat richtig mit Verlag un ISBN-Nummer rutkamen is.
Hier hett he opschreben, wat he beleevt hett as Leedermaker "twischen Kinnerstuuv un Kummerkamer"

Literarische Vorträge von Volkert Ipsen:

För dat Plattdüütschzentrum in Holsteen (Zentrum für Niederdeutsch im Landesteil Holstein) hett Volkert Ipsen Vördrääg över plattdüütsche Literatur utarbeid. - Liekers he nu nich mehr bi't Plattdüütschzentrum arbeiden deit, kann een anfragen, wat he nich Tiet un Lust hett, en Vördrag to holen.

Dütt sünd siene Themen:

"De Schosterkrog: Wo de Snack regeert. Dörpsleven in de plattdüütsche Literatur."

"Abel, Meta un Trine - Fruunslüüd in de plattdüütsche Literatur."

"Plattdüütsche Jungs in'n Krieg. 14/18 un de tweete Krieg in de plattdüütsche Literatur."

"Snackt Platt mit Thomas Mann" - Plattdüütsch in de "Buddenbrooks": wat Volkert Ipsen dorto infullen is.

För VHS-Gruppen, plattdüütsche Krinks un Vereene kümmt Volkert Ipsen geern to'n Vördrägen.

LPs und CDs von Volkert Ipsen:

	Volkert Ipsen: Leeder, de ik speel. ariola (LP) Titellist
	Volkert Ipsen: Disco, Dunnersdag Abend in'e Kroog ariola (Single) Titellist
	Volkert Ipsen: Wenn de Blauen Jungs we 'r spälen. Texte und Musik: Volkert Ipsen. Musikmaschine Tonstudio Andresen, Lübeck 1998/1999 (CD) Titellist
	Volkert Ipsen: Düster överall. Texte und Musik: Volkert Ipsen. Fools Wood Production 2000 (CD) Titellist
	Volkert Ipsen: Kiek doch eenmol na mi hen Texte und Musik: Volkert Ipsen. Musikmaschine Tonstudio Andresen, 2003 Ilgrov (CD) Titellist

Bücher von Volkert Ipsen:

	Volkert Ipsen: Mien AB Lübeck (Selbstverlag) o.J.
	Volkert Ipsen: Nordstrand fangt an bi de Damm Lübeck (Selbstverlag) o.J.
	Volkert Ipsen: Na Odenbüll, Krüüzweg un Noorden Gedichten Lübeck (Selbstverlag) o.J.
	Volkert Ipsen: En bleuhen Boom Gedichten. Nasett Lübeck (Selbstverlag) 2000
	Volkert Ipsen: Heimat un Wöer Gedichten un Gedenken Lübeck (Selbstverlag) 2002
	Volkert Ipsen: Ik weer op Pellworm Gedichten Lübeck (Selbstverlag) 2011
	Volkert Ipsen: "Tüüssadüüss" Mien Leedermaker-Leven twischen Kinnerstuuv un Kummerkamer Hamburg (TIET FÖR PLATT-VERLAG) 2011 ISBN 978-3-9814757-0-8

Kontakt:

Volkert Ipsen
Stresemannstraße 32
D-23564 Lübeck
Tel. 0451-2969974
E-Mail: sienjung@googlemail.com
http://mienleeder.blogspot.com/

Zurück

Düsse Siet is maakt or verbetert worrn an'n 11.01.2012.

Volker Holm
Zentrum für Niederdeutsch in D-23909 Ratzeburg
http://www.niederdeutsch-zentrum.de/ - zfn@zfn-ratzeburg.de